Аудио :: Аудио:: Узденов Альберт

Таш бла ургъанны, аш бла ур.
Тенгни тенглиги джашай барсанг билинир.
Къонагъынгы артмагъын алма да, алгъышын ал.
Баш болса, бёрк табылыр.
Къыз тиширыу кеси юйюнде да къонакъды.
Ач къарынны, токъ билмез
Ариу сёз – къылычдан джити.
Адам къыйынлыгъын кёлтюрюр, зауукълугъун кёлтюрмез.
Кеси юйюмде мен да ханма.
Джылыгъа джылан илешир.
Акъыл бла адеб эгизледиле.
Билим насыб берир, билим джолну керир.
Экеу тутушса, биреу джыгъылыр.
Адамны аты башхача, акъылы да башхады.
Иги сёз – джаннга азыкъ, аман сёз башха – къазыкъ.
Чабар ат – джетген къыз.
Джюрекден джюрекге джол барды.
Къонакъ аз олтурур, кёб сынар.
Тюзню ётмеги тюзде къалса да, тас болмаз.
Бал ашаргъа сюе эсенг, чибин ургъаннга тёз.
Адам сёзге тынгыла, акъыл сёзню ангыла.
Суу да къайтады чыкъгъан джерине.
Тойгъандан сора, ашны сёкме.
Кёл ашады да, кеси ашады.
Чомартны къолун джокълукъ байлар.
Ариуну – ауруу кёб.
Джарлы эскисин джамаса, къууаныр.
Бюгюн дуния кибик, тамбла ахыратды.
Джерни букъусу кёкге къонмаз.
Сютню башын джалагъан къутулур, тюбюн ичген тутулур.
Ишни ахырын ойламай, аллын башлама.
Иши джокъну, сыйы джокъ.
Хаухну атма, ёнгкючню сатма.
Джолунга кёре – джюрюшюнг, джагъанга кёре – юлюшюнг.
Ёксюзню тилеги къабыл болур.
Ашлыкъ – бюртюкден, джюн – тюкден.
Ач да бол, токъ да бол – намысынга бек бол.
Аманнга да, игиге да оноусуз къатышма.
Адамны аманы адамны бети бла ойнар.
Ана къолу ачытмаз.
Хар адамгъа кеси миннген тау кибик.
Ашхы адам – халкъ байлыгъы, ашхы джер – джашау байлыгъы.
Бети – къучакълар, джюреги – бычакълар.
Къуллукъчума, деб махтанма, къуллукъ – хаух джамчыды!
Ауругъан – джашаудан умутчу.
Къолу уллу – асыу, аягъы уллу – джарсыу.
Ётюрюкню къуйругъу – бир тутум.
Тыш элде солтан болгъандан эсе, кесинги элде олтан болгъан игиди!
Ашлыкъны арба юйге келтирир, чана базаргъа элтир.
Ачыкъ джюрекге джол – ачыкъ.

Логин:	Регистрация

Пароль:	Забыли пароль?

Запомнить меня

Аудио

Узденов Альберт

Скачать

Адрес