Аудио :: Аудио:: Отаров Омар

Тойгъанлыкъ къойгъа джарашады.
Къонакъ аз олтурур, кёб сынар.
Бир онгсуз адам адет чыгъарды, деб эштирик тюлсе.
Тамбла алтындан бюгюн багъыр ашхы.
Тыш элде солтан болгъандан эсе, кесинги элде олтан болгъан игиди!
Таукелге нюр джауар.
Ёлюр джаннга, ёкюл джокъ.
Ауузу бла къуш тута айланады.
Тилчи тилден къаныкъмаз.
Керилген да, ургъан кибикди.
Ёксюзню къалачы уллу кёрюнюр.
Арпа, будай – ащды, алтын, кюмюш а – ташды.
Джол бла сёзню къыйыры джокъ.
Эл тойса, тоймагъан, эл къойса, къоймагъан.
Келинин тута билмеген, къул этер, къызын тута билмеген, тул этер.
Къатыны харакетли болса, эри къымсыз болур.
Байлыкъ келсе, акъыл кетер.
Эринчекни аурууу – кёб.
Окъугъан озар, окъумагъан тозар.
Малны кют, джерни тюрт.
Къарны аманнга къазан такъдырма, къолу аманнга от джакъдырма.
Ойнай билмеген, оюн бузар.
Джетген къыз джерли эшекни танымаз.
Биреуню эскиси биреуге джангы болмайды.
Джылар джаш, атасыны сакъалы бла ойнар.
Ашын ашагъанынгы, башын да сыйла.
Уллу къашыкъ эрин джыртар.
Суу ичген шауданынга тюкюрме.
Таш ата билмеген, башына урур.
Эки къатын алгъанны къулагъы тынгнгаймаз.
Къолу уллу – асыу, аягъы уллу – джарсыу.
Сакъ юйюне сау барыр.
Билимли ёлмез, билимсиз кёрмез.
Аман эсирсе, юйюн ояр.
Акъыл аздырмаз, билим тоздурмаз.
Ханы къызы буюгъа-буюгъа киштик болду.
Сууда джау джокъ, кёб сёзде магъана джокъ.
Ариу сёзде ауруу джокъ.
Башы джабылгъан челекге, кир тюшмез.
Ишлемеген – тишлемез.
Чомартха хар кюн да байрамды.
Эрни эр этерик да, къара джер этерик да, тиширыуду.
Айранны сюйген, ийнек тутар.
Ач отунчуну ачыуу – бурнунда.
Кёзю сокъурдан – къоркъма, кёлю сокъурдан – къоркъ.
Адамны аты башхача, акъылы да башхады.
Урунуу – насыбны анасы.
Окъдан джара эртде-кеч болса да бителир, сёз джара, ёмюрге къалыр.
Нёгерсизни джолу узун.
Къонакъ кёб келюучю юйню, къазаны отдан тюшмез.

Логин:	Регистрация

Пароль:	Забыли пароль?

Запомнить меня

Аудио

Отаров Омар

Скачать

Адрес