- Кёзю сокъурдан – къоркъма, кёлю сокъурдан – къоркъ.
- Адамны адамлыгъы къыйынлыкъда айгъакъланады.
- Эркиши – от, тиширыу – суу.
- Болджал ишни бёрю ашар.
- Акъыллы эркиши атын махтар, акъылсыз эркиши къатынын махтар.
- Къарт болгъан джерде, берекет болур, сабий болгъан джерде, оюн болур.
- Эллинг бла джау болсанг да, юйюнг бла джау болма.
- «Ёгюз, джаргъа джууукъ барма, меннге джюк боллукъса», - дегенди эшек.
- Ауругъаннга – кийик саулукъ, джетген къызгъа – чилле джаулукъ.
- Къазанны башы ачыкъ болса, итге уят керекди.
- Кёл ашады да, кеси ашады.
- Кёлю джокъну – джолу джокъ.
- Таугъа чыгъаллыкъ эсенг, тюзде къалма.
- Игиге айтсанг – билир, аманнга айтсанг – кюлюр.
- Хар сёзню орну барды.
- Садакъачыны джаны – къапчыгъында.
- Бёрю да ач къалмасын, эчки да ашалмасын.
- Ёксюзню тилеги къабыл болур.
- Эрни эр этерик да, къара джер этерик да, тиширыуду.
- Адамны сыфатына къарама, сёзюне къара.
- Сакъламагъан затынга джолукъсанг, не бек къууанаса, не бек ачыйса.
- Тюз сёз баргъан сууну тыяр.
- Аз сёлеш, кёб ишле.
- Акъыллы башны – тили къысха.
- Тынгылагъан тынгы бузар.
- Таукел къуру къалмаз.
- Кюн – узун, ёмюр – къысха.
- Термилгенинги табмазса, кюлгенинге тюберсе.
- Нафысынгы айтханын этме, намысынгы айтханын эт.
- Джангыз торгъай джырламаз.
- Билимсиз иш бармаз.
- Кюл тюбюндеги от кёрюнмейди.
- Джырына кёре эжиую.
- Иги сеники эсе да, сюйген кесимикин этеме.
- Къонакъ болсанг, ийнакъ бол.
- Адам къаллай бир ишленмесе, аллай бир кесин уллу кёреди.
- Акъыллы айтыр эди, акъылсыз къоймайды.
- Айран ичген – къутулду, джугъусун джалагъан – тутулду.
- Кёзден кетген, кёлден да кетеди.
- Юйюнгден чыкъдынг – кюнюнгден чыкъдынг.
- Ашыкъгъанны этеги бутуна чырмалыр.
- Эки ойлашыб, бир сёлешген.
- Адамны аты башхача, акъылы да башхады.
- Адамны сабийин сюйген джюреги, бычакъча, джитиди.
- Къыз чыгъаргъан – къызыл къымжа.
- Джуртун къоругъан озар.
- Сакъалы текени да бар, мыйыгъы киштикни да бар.
- Ат да турмайды бир териде.
- Тил – миллетни джаны.
- Джахил болса анасы, не билликди баласы?
Профиль
|
|
|
|||