- Джылкъыдан – ат чыгъар, тукъумдан – джаш чыгъар.
- Аман эсирсе, юйюн ояр.
- Керек ташны ауурлугъу джокъ.
- Тешигини къатында, чычхан да батыр болур.
- Уллу атлама – абынырса, уллу къабма – къарылырса.
- Ана кёлю – балада, бала кёлю – талада.
- Къатын байлыкъны сюер, эр саулукъну сюер.
- Джырына кёре эжиую.
- Тойгъан джерге джети къайт.
- Башда акъыл болмаса, эки аякъгъа кюч джетер.
- Уллу къазанда бишген эт, чий къалмаз.
- Къызгъанчдан ычхыныр, мухардан ычхынмаз.
- Ата – баланы уясы.
- Башы ишлегенни, ауузу да ишлер.
- Джангыз торгъай джырламаз.
- Къыз чыгъаргъан – къызыл къымжа.
- Иги болса, тамадама – махтау, аман болса, меннге – айыб.
- Экеу тутушса, биреу джыгъылыр.
- Насыб бютеу халкъны юлюшюдю.
- Игини сыйлагъан адетди.
- Эркиши – от, тиширыу – суу.
- Азыкълы ат арымаз, къатыны аман джарымаз.
- Ашхы – джыяр, аман – джояр.
- Ётюрюкню къуйругъу – бир тутум.
- Акъыл неден да кючлюдю.
- Къонагъынгы артмагъын алма да, алгъышын ал.
- Рысхы – сют юсюнде кёмюк кибикди.
- Шапа кёб болса, аш татымсыз болур.
- Тиширыусуз юй – отсуз от джагъа.
- Кирсизни – саны таза, халалны – къаны таза.
- Ёгюзню мюйюзлери ауурлукъ этмейдиле.
- Ёзденликни кёбю ётюрюк.
- Джети тилни билген джети кишиди.
- Уллу къашыкъ эрин джыртар.
- Къонакъ аман болса, къонакъбай джунчур
- Келлик заман – къартлыкъ келтирир, кетген заман – джашлыкъ ёлтюрюр.
- Дууулдаса – бал чибин, къонса – къара чибин.
- Чомарт бергенин айтмаз.
- Тойгъан антын унутур.
- «Ма», - дегенни билмесенг, «бер», - дегенни билмезсе.
- Къарт айтханны этмеген, къартаймаз.
- Иги – алгъыш этер, аман – къаргъыш этер.
- Ариу сёз – къылычдан джити.
- Бети бедерден, намыс сакълама.
- Чомартны къолун джокълукъ байлар.
- Тамбла алтындан бюгюн багъыр ашхы.
- Джукъу тёшек сайламайды.
- Къартны сыйын кёрмеген, къартлыгъында сыйлы болмаз.
- Урама да – ёледи, сатама да – келеди.
- От этилмеген джерден тютюн чыкъмайды.
Профиль
|
|
|||