Аудио :: Аудио:: Кайтаев Магомед

Баргъанынга кёре болур келгенинг.
Аджашханны ызындагъы кёреди, джангылгъанны джанындагъы биледи.
Башланнган иш битер, къымылдагъан тиш тюшер.
Ёлген ийнек сютлю болур.
Ышармагъан – кюлмез, кюлмеген – къууанчны билмез.
Къарыусузгъа кюлме, онгсузгъа тийме.
Тенгинг джокъ эсе – изле, бар эсе – сакъла!
Аман къатын алгъан, арыр, иги къатын алгъан джарыр.
Кийимни бичсенг, кенг бич, тар этген къыйын тюлдю.
Дуния мал дунияда къалады.
Хар сёзню орну барды.
Эллинг бла джау болсанг да, юйюнг бла джау болма.
Аман адам элни бир-бирине джау этер.
Киштикге къанат битсе, чыпчыкъ къалмаз эди.
Къыз келсе, джумуш эте келеди, къатын келсе, ушакъ эте келеди.
Бермеген къол, алмайды.
Чакъырылмагъан къонакъ – орунсуз.
Ачылгъан эт джабылыр, кёрген кёз унутмаз.
Тешигини къатында, чычхан да батыр болур.
Атлыны кёрсе, джаяуну буту талыр.
Аманнга да, игиге да оноусуз къатышма.
Байдан умут эте, джарлыдан ёгюз багъасы къорады.
Джеринден айырылгъан – джети джылар, джуртундан айырылгъан – ёлгюнчю джылар.
Биреу ашаб къутулур, биреу джалаб тутулур.
Эркишини аманы тиширыуну джылатыр.
Джырчы джырчыгъа – къарнаш.
Эл бла кёргенинг эрелей.
Этни бети бла шорпасы.
Ариу сёз аурууунгу алыр.
Джаш къарыу бла кючлю, къарт акъыл бла кючлю.
Мадар болса, къадар болур.
Чомартха Тейри да борчлуду.
Ач да бол, токъ да бол – намысынга бек бол.
Ёмюрлюк шохлукъну джел элтмез.
Башы джабылгъан челекге, кир тюшмез.
Къулакъдан эсе, кёзге ышан.
Тамырсыз терекге таянма – джыгъылырса.
Юйлю уругъа ит чабмаз.
Джангыз терек къынгыр ёсер.
Ёлген аслан – сау чычхан.
Кютгени беш эчки, сызгъыргъаны уа, джерни джарады.
Къонакъ хазыр болгъанлыкъгъа, къонакъбай хазыр тюлдю.
Накъырда – кертини келечиси.
Бал чибинни ургъаны – ачы, балы – татлы.
Эркишиге тары кебек танг кёрюнюр.
Алтыннга тот къонмаз.
Шекер бла туз – бир болмаз, ушамагъан – юй болмаз.
Кийимни бир кюнню аясанг, минг кюннге джарар.
Болджал ишни бёрю ашар.
Бети – къучакълар, джюреги – бычакълар.

Логин:	Регистрация

Пароль:	Забыли пароль?

Запомнить меня

Аудио

Кайтаев Магомед

Скачать

Адрес